Am Sunntig simmer zum Christchindli gangä (leider hämmers grad verpasst; äs hät nur schnäll d Bäum is Dorf bracht und isch grad wieder wiiter...) um eusä Baum abzholä. Am Lars und am Yannis hani verzellt, jedä Baum suächi sich ä Familiä us. Mä müäsi dä Baum nur ganz lieb frögä ob er welli mit eus hei cho und wänns dä richtig Baum isch, dänn seit er ja! Äs git chlini Bäumli diä wännd eher inä chlini Stubä, äs git riisigi Bäum diä wänd inä ganz ganz grossi Stubä und dänn gits irgendwo au no än Baum wo zu eus wett...
Dä Lars isch dänn zumänä Baum gangä und hät ihn gfrögäd ob er welli zu eus hei cho!!! Er hät ihn ganz liislig gfrögäd und woni dänn gfrögäd ha was dä Baum gseit hegi da seit er ganz luut Jaaaaaaaaaaaaaaaaa
Und so staht jetzt genau de Baum da bi eus diheimä wo zu eus hät wellä hei cho!
