Ab uf dä Spielplatz

Am liäbschtä spilläd mir ja bi eus im Gartä, aber s Mami will ab und zuä ja au mal no öppis anders gseh!!! Also hämmer eusi Autos unders Fudi gschnallt und sind ab uf dä nöchschti Spielplatz dubäd...


Det hämmer dänn zerscht mal äs Ufwärmtänzli gmacht...
huii hät das Spass gmacht und s Mami hät glaub scho lang nümm so giggäläd...


...und dänn hämmer natürli de Spielplatz total usgchoschtäd;
s isch ebä glich no luschtig gsi - au für eus...


Summ summ summ... Bienchen summ herum...

...dänn nochli rutschä, chlättärä, äs z Vieri ässä ufäm Spielplatz...

...wieder am Bach na heiwärts, natürli nöd ohni no hunderttusig Stei vom Brüggli is Wasser z plumsä la... und dänn wieder heidüsäd und händ nochli im Gartä dörfä spillä... dä bescht Spielpatz hämmer ebä scho diheimä!