Mittagsschlaf ade...

Sit äs paar Täg macht dä Lars kein Mittagsschlaf meh, er hätt bis vor churzäm no über 2 Stund über dä Mittag pfusäd, hät jetzt aber erlickt, dass wänn er nöd will schlafä (zwingä chammers ja nöd), dass er dänn dörf Büächli im Zimmer aluägä. Diä erschtä vier, foif Mal hät das au super klappt.
Er hät akzeptiert (ohni Muulä), dass er dänn eifach sött im Zimmer blibä und lislig si. Dänn isch ihm das aber langwiilig wordä und er hät wellä über dä Mittag is Spielzimmer ga, was s Mami aber nöd hät wellä. So häts agfangä, dass immer meh Sachä vom Spielzimmer i sim Zimmer glandäd sind, und so gsehts dänn amäl us nach einärä Stund...




Hüt hämmers so, dass er ei Stund im Zimmer bliibt, dänn dörf er is Spielzimmer go spilä und wänn dä chli Brüäder wach isch, dänn därf er wieder abä cho... er hät aber so sini Tricklis uf Lager. Entweder muäss er dänn hundert mal go Bisi machä, hät grad Buchweh, wott scho vor derä Stund im Zimmer öppis usäm Spielzimmer wills ohni das nöd gaht, oder er rüäft so luut nach äm Mami, dass sie chunnt will suscht dä Yannis erwacht... dä Lars isch ebä um Kei Idee z müäd...

Aber bim Nachtässä chunnt dänn dä Ibruch und er pfust facht ii bim Ässä...